Rev 5 | KYG | STEP | Agovana yagaino ne'apateya siate'mo fai mai'niya vekamo'a apepale'mo aluga aluga aupilaga'amo avo'mo kaeteno alino kafage ki male'neno seveni'a afina'mo kameleti'mo faleteno aino kamaeteno lamaga ayapi'mo ali'niye.

Revelation of John 5

Avo'mo kaeteno'ae'mo alino kafage kino male'niya gemae

1 Agovana yagaino ne'apateya siate'mo fai mai'niya vekamo'a apepale'mo aluga aluga aupilaga'amo avo'mo kaeteno alino kafage ki male'neno seveni'a afina'mo kameleti'mo faleteno aino kamaeteno lamaga ayapi'mo ali'niye. 2 Agovana mago lokiya enisole vekamo'a, Ina la'mo himamu'age vekamo mai'niyanageno seveni'a kamemo afa'a alino akauteno alino ata legaiye, huno alopa gefati'mo aeno hakalo huno hapa pai'niye. 3 Hapa pai'niya'monanafa muki koku'napi ne'maiya vaya'mogimo ma mopafi ne'maiya vaya'mogimo ma mopamo afe'alumelagamo ne'maiya vaya'mogimo hu'a afa'a avo'mo kae male'niya gemo ali'a akaute'a ali'a ata le'a o'agegae. 4 Magoke vekamo'a afa'a alino ata leno lekana paisiya vekamo alagi o'mai'niya'mofe'mo lusi kava hu'na avi'ya nehugeno'ae'mo 5 mago vayatama vekamo'mo, Avi'ya osuvo. Ago, Yuta nofi vayapati'mo laiyonimo Nevini nofi hafu'ya'agana huno mai'niya vekamo'a muki kava'e vaya'e'mo aeno apakase'niyanageno seveni'a kamemo afa'a alino akauteno alino ata legaiye, huno naha pai'niye.

6 Naha pai'nige'nae'mo agovana mago aikeli sipisipimo'a yagaino ne'apateya vekamo siate'mo fai mai'niya vekamo aulagale'mo mai'nige'a lole'e lole'e vaya'e tueti fo'a vayatama vaya'mogi'e'mo fai'a ku ai'a ate'nae. Amagi'nageno fali'niya aikeli sipisipigana huno mai'niye. Agaemo agenopafati'mo seveni'a lokiya'amo haneteno seveni'a aulagamo hane'niye. Seveni'a aulagamo hane'niya kava huno Goti Auneme'amo himamu'amo seveni'a himamu'amo alino ate'nigeno muki ma mopafi'mo uneno nehiya Auneme himamu'amo hane'niye. 7 Agaemo uno yagaino ne'apateya siate'mo fai mai'niya vekamo lamaga ayapati'mo alino kafage ki male'niya pepamo ali'niye.

8 Ali'nige'apae'mo lole'e lole'e vaya'e tueti fo'a vayatama vaya'mogi'e'mo aikeli sipisipimo aiyafi'mo apago'ya fai'a asagau'a ai'nae. Muki'amogimo apamete apamete hu'a alopa gitagana ya'mo alige alopa goli yuvapa alige hute'a mai'nae. Ani yuvapafi'mo atafi'mo nekageno alagepa atumo ne'aiya agufa ya'mo hane'niya kava huno apaote vaya'mogimo nunumu nehaya gemo hane'niye. 9 Apakaemo saufa yokemo hu'apae'mo,

Kamagi'nageka faliteka Gotitefe'mo kolakaleti'mo miya faika late'nane. Kagaemo muki nofi vayanagi muki alu apake alu apakemo ne'aiya vayanagi muki alu apakufa'e alu apakufa'e vayanagi muki alu kotega alu kotegamo ne'maiya vayanagi huka miya faika hatu maeka late'nana'mofe'mo alino kafage ki male'niya pepaleti'mo kamemo afa'a alika akautaleka alika ata lesana vekamo mai'nane. 10 Kagaemo yagaita apatesuna kini vaya'mo maige mono huta apatesuna vaya'mo maige hu'neta Goti ali'ya'amo alisunafe'mo alika hamaleka late'nananageta ma mopafi'mo yagaita apategaune,
hu'a hu'nae.

11 Hutage'na apakovana tauseni tauseni'a enisole vaya'mogimo apake ai'nage'na afi'nove. Apakae'e lole'e lole'e vayatama vaya'mogi'e'mo yagaino ne'apateya sia'ale'mo fai'a ku ai'a ate'nae. 12 Apakaemo alopa gefati'mo,

amagi'nageno fali'niya aikeli sipisipimo'a alagi alisiya vekamo mai'niya'mofe'mo himamu'amo alige muki alagepa kagemi ya'amo alige afiteno age'niya kava'amo alige lokiya ya'amo alige ala agi'amo alige ha le konali ya'amo alige muki ya'amo fiku alige hisiya vekamo mai'niye,
hu'a hu'nae. 13 Afi'novana muki koku'napi vayanagi ma mopafi vayanagi ma mopamo afe'alumelaga vayanagi solovala anipi vayanagi muki haopalegamo ne'maiya vayanagi hu'a ge nehage'na afi'nove. Hu'apae'mo,

Yagaino ne'apateya siate'mo fai mai'niya veka'e aikeli sipisipi veka'efe'mo hanao ke hege ala anaki'anile'mo ali'a asaga hu'a anatege muki ya'age lokiya vekalane, hu'a huge hume hume u'a maiyo,
hu'a hu'nae. 14 Lole'e lole'e vaya'mogi, He lama ge, hu'a hu'nage'apae'mo tueti fo'a vayatama vaya'mo apago'ya fai'a asagau'a aite'a maige maige huno maino hano osuno maisiya vekae'mo mono hu'nae.